Kryeministri i sapo zgjedhur i Kosovës, Albin Kurti është shprehur optimist se Vjosa Osmani do të bëhet presidente në seancën e radhës.
Ai në një prononcim për media pas përfundimit të seancës së jashtëzakonshme për formimin e Qeverisë së re të Kosovës, ka thënë se vendi nuk ka nevojë për kriza të reja politike dhe se ai do të marrë mandatin sa më shpejt që është e mundur.
Kurti: Unë do ta marr detyrën një orë e më parë, nuk kam kohë për të humbur
Video
“Kosova është në krizë të shumëfishtë dhe nuk ka nevojë për kriza të reja. Më së miri do të ishte të fillojmë të dalim nga kriza shëndetësore, sociale, arsimore, kulturore, prandaj sa më parë që arrijmë ta thërrasim seancën e radhës pas zëvendësimit të deputetëve që u bën ministra dhe ta zgjedhim presidenten Vjosa Osmani, aq më mirë do të jetë për të gjithë. Unë do ta marr detyrën një orë e më parë, nuk kam kohë për të humbur dhe besoj se do të bëhen të gjitha përgatitjet teknike e logjistike që nesër paradite të marrë detyrën”, ka thënë Kurti.
I pyetur nëse do të ketë kompromis për zgjedhjen e presidentit të ri, Kurti është shprehur optimist se Vjosa Osmani do të bëhet presidente në seancën e radhës.
Kurti: Nuk duhet kërkuar alternativa për zgjedhjen e presidentit të ri
Video
“Ju e dini shumë mirë se i vetmi personalitet publik i cili në skenën tonë shtetërore, politike nuk ka anëtarësi në subjekt politike, ka treguar integritet njerëzor dhe e ka mbajtur atë institucional dhe më fund fitoi mbi 300 mijë vota është Vjosa Osmani dhe nuk besoj se duhet kërkuar alternativa. Është mirë që në seancën e ardhshëm që të gjithë të bëhemi bashkë dhe të kalojmë te zgjedhja e presidentit dhe të dalim nga krizat e njëpasnjëshme dhe jo ta shtojmë edhe një të tjetër pa nevojë”, ka thënë Kurti.
Kurti ka komentuar edhe mundësinë e dërgimit të zgjedhjes së tij në Gjykatën Kushtetuese nga LDK-ja.
Kurti: Nuk ka rast për Kushtetuese
Video
“Nuk mund të komentoj iniciativat e të tjerave pa i parë, por mund të them se nuk ka rast për Gjykatën Kushtetuese”, ka thënë Kurti.
Ndryshe, LDK sot ka paralajmëruar dërgimin në Kushtetuese në rast se Albin Kurti do të zgjidhet kryeministër i ri pasi që është i akuzuar për vepër penale brenda tri vjetësh sipas aktgjykimit të plotë të Kushtetueses në lidhje me rrëzimin e Qeverisë Hoti. /KP