Ish-ushtruesja e detyrës së presidentes Vjosa Osmani ka uruar Albin Kurtin me rastin e zgjedhjes së tij për kryeministër të ri të vendit, duke thënë se me këtë u dëshmua vullneti i shprehur i qytetarëve në zgjedhjet e 14 shkurtit.
Qeveria Kurti 2 mori sot besimin e deputetëve të legjislaturës së tetë të Kuvendit, me 67 vota pro, 30 kundër dhe asnjë abstenim.
Pas zgjedhjes së kryetarit të ri të Kuvendit të Kosovës Glauk Konjufca, ky i fundit do të jetë ushtrues detyre i presidentit të vendit.
Vjosa Osmani e cila i ka dorëzuar sot detyrën Konjufcës, në një postim në Facebook ka thënë se sfidat me të cilat do të përballet Qeveria e re janë të shumta, por që ajo beson se politikat e saj do të jenë të drejta dhe do të përmbushin pritjet e qytetarëve.
Postimi i plotë:
Urime, kryeministër Kurti
Votimi juaj sot në Kuvendin e Republikës së Kosovës si kryeministër i vendit tonë dhe i kabinetit qeveritar është reflektimi më i saktë e më i sinqertë i vullnetit të qytetarëve tanë, ashtu siç është shprehur qartë më 14 shkurt.
Vërtet sfidat janë të shumta, qoftë ato të trashëguara e qoftë ato të reja, por në rrugëtimin që filloi sot, uroj që vendimet e politikat tuaja të jenë shëmbëlltyra më e mirë e nevojave, kërkesave e ëndrrave të qytetarëve të vendit tonë.
Sot është jo vetëm Ditë e Bardhë, por një kapitull i ri në historinë e Republikës, ndaj pres që së bashku të punojmë drejt përmbushjes së pritjeve të qytetarëve tanë, ashtu siç i kanë shprehur ata zëshëm në kutitë e votimit!
Qoftë fillim i mbarë e një rrugëtim nga i cili do të dalim të gjithë faqebardhë!
Na priftë e mbara në rrugëtimin tonë të drejtë, me të cilin Kosova jo vetëm do ta përjetojë ndryshimin, por edhe do ta ndjejë çdo ditë, në çdo hap dhe për çdo gjë!
Për krejt dhe pa përjashtim, për të gjithë dhe pa dallim, për Kosovën shtëpi tonë të përbashkët./KP