Iniciativa Qytetare për Obiliqin ka filluar me konstituimin e kryesive të degëve të saj, ku gjatë ditës së sotme ka mbajtur dy mbledhje konstituive të degës së Dardhishtës dhe Obiliqi 1.
I pranishëm në strukturimin e këtyre degëve ishte edhe kryetari i Komunës së Obiliqit, Xhafer Gashi, i cili falënderoi të gjithë anëtarët për pjesëmarrjen e tyre e njëkohësisht për përkrahjen e vazhdueshme që kanë dhënë gjatë rrugëtimit politik.
“I gjithë ky organizim dhe interesim i jashtëzakonshëm i qytetarëve që të bashkohen në strukturat tona tregon qartë se mbështesin fuqishëm përkushtimin tonë në zhvillimin e qytetit të Obiliqit”, ka thënë Gashi.
Iniciativa Qytetare për Obiliqin ka bërë konstituimin e dy degëve në të cilat u zgjodhën kryetarët dhe organet tjera drejtuese. Kësisoj, degën e Dardhishtës do ta udhëheqë Burim Gërguri, ndërsa dega Obiliqi 1 do të udhëhiqet nga Gëzim Gashi.
Ndryshe, kohë më parë Xhafer Gashi është tërhequr nga të gjitha strukturat e AAK-së, dhe ka vendosur të mbajë postin e kryetarit të komunës së Obiliqit, ndërsa ka hedhur poshtë pretendimet për një kalim të tij eventual në ndonjë parti tjetër./KP