Lëvizja FOL ka publikuar raportin për shkallën e realizimit të planit të punës së Këshillit Prokurorial të Kosovës dhe Prokurorit të Shtetit, për vitin 2020-të, ku të dhënat tregojnë se ky i fundit ka realizuar 97% të planit ndërsa KPK 81% të planit vjetor të punës për vitin e kaluar. Në tryezën e Lëvizjes FOL, nga institucioni i Prokurorit të Shtetit kanë thënë se askush nuk mund të ketë ndikim mbi këtë institucion të drejtësisë.
Prokurori, Bahri Hyseni tha se institucionet e drejtësisë janë duke e kryer punën e tyre dhe asnjë person nuk mund të ketë ndikim mbi të njëjtat.
Hyseni: Askush nuk mund të ndikojë në Prokurorin e Shtetit
“Ne jemi duke e bërë punën, po ju garantoj që asnjë person, qysh e kam thënë si kryesues, sot po e them edhe në cilësi të prokurorit, asnjë ndikim askush nuk ka mundësi me bë të Prokurori i Shtetit, nuk ka njerëz më shumë se ne që kemi akuzuar, kemi akuzuar krejt nivelet, krejt nivelet në Kosovë janë akuzuar, prej nivelit më të lartë, tash gjykimet përfundimtare nuk është bash lehtë sepse duhen prova, hezitojnë, mirëpo e rëndësishme që me u akuzu janë akuzuar, akuzat ngrite nju e dini që me një dyshim të kallëzuar mirë sepse nuk do të duhej me kalu as në seancë fillestare. A duhet me ngritë nivelin, gjithsesi po, jemi duke punuar në këtë drejtim dhe Zyra e Kryeprokurorit të shtetit është e përkushtuar që me rritë edhe këtë nivel që mos me pas probleme”, tha ai.
Ai tha se pavarësisht situatës me pandeminë, 50 mijë lëndë të regjistruara kanë arritur të përfundohen.
Hyseni: Te Prokurori i Shtetit nuk ka parashkrime të lëndëve
“Te Prokurori i Shtetit nuk ka parashkrime, parashkrimet janë zero, sepse po na dalin nganjëherë disa në media që po parashkruhen lëndët, nuk ka parashkrime, parashkrimet mund të jenë me zero, mund të ketë ndonjë lëndë që mund të ndodh për ndonjë çështje por nuk kemi parashkrime, parashkrimet ndodhin në gjykatë”, tha ai.
Ndërsa kryesuesi i Këshillit Prokurorial të Kosovës, Jetish Maloku tha se pandemia ka ndikuar negativisht në punën e KPK-së.
Maloku: Pandemia ka ndikuar negativisht në punën e KPK-së
“E kemi parasysh, sidomos rrethanat e krijuara në vitin 2020 për fat të keq me këtë virus Covid-19 dhe kjo ndoshta ka qenë edhe guri më i rëndë në këshill por në sektorë të tjerë të drejtësisë, kemi pas telashe njëherë me ju përshtatë gjithë atyre rrethanave por pa dilemë ka ndikuar shumë negativisht në punën tonë të përditshme që e kemi bërë qoftë në institucionin Këshillit Prokurorial qoftë edhe nëpër prokurori themelore”, tha ai.
EAlbana Hasani nga Lëvizja FOL, derisa prezantoi raportin tha se gjatë hulumtimit, nga 143 aktivitete ë realizuara nga KPK, ka pasur të dhëna të publikuara vetëm për 18 aktivitet, derisa të realizimet e Prokurorit të Shtetit kanë qenë të publikuara vetëm dy aktivitete nga 31 sa ishin realizuar.
Hasani: Këshilli Prokurorial i Kosovës ka realizuar 144 aktivitete nga 177 sa ishin paraparë për vitin 2020
“Sipas përgjigjeve dhe të dhënave të pranuara nga Këshilli Prokurorial i Kosovës nga 177 aktivitete sa ishin paraparë të realizohen në planin e Punës së Këshillit Prokurorial të Kosovës për vitin 2020, Këshilli kishte arritur të përmbushë 143 prej tyre, ndërsa 34 aktivitete të tjera nuk kishin arritur të finalizoheshin brenda kohës së paraparë në këtë plan. Ndërkaq, gjithmonë duke u bazuar në të dhënat e pranuara nga Prokurori i Shtetit nga 32 aktivitete sa ishin paraparë të realizohen në këto plane, Prokurori i Shtetit kishte arritur të realizonte 31 prej tyre”, tha ajo.
Lëvizja FOL ka rekomanduar që të publikohen të gjitha të dhënat në lidhje me çdo aktivitet të realizuar të objektivave të përcaktuara nga e Këshillit Prokurorial të Kosovës dhe Prokurorit të Shtetit.
Gjithashtu, ka rekomanduar që në publikohen raportet në fund të çdo viti me objektivat e arritura të vendosura në Planet e Punës për vitet përkatëse.
Tutje, FOL ka rekomanduar që të krijohen grupe punuese brenda Këshillit Prokurorial të Kosovës dhe Prokurorit të Shtetit në mënyrë që të monitorohet realizimi i objektivave./KP