Kryetarja e iniciativës Komuniteti i Bashkuar, Adriana Hoxhiq, ka kritikuar Kosovën për qasje jo të barabartë ligjore për komunitetet në Kosovë.
Gjykata Supreme vendosi sot që të hedhë poshtë ankesat e Lëvizjes Vetëvendosje, Iniciativës Rome, Partisë Liberale Egjiptiane, Partisë së Ashkalive për Integrim, Lëvizjes Përparimtare të Romëve të Kosovës, Iniciativës Qytetare Komuniteti i Bashkuar- Adrijana Hoxhiq dhe Unionit Socialdemokrat (SDU).
Hoxhiq, e cila i ishte drejtuar Gjykatës Supreme për të kundërshtuar një vendim të Panelit Zgjedhor për Ankesa dhe Parashtresa që ia anuloi mbi 4.200 vota, që i kishte siguruar në komunat e banuara me shumicë serbe, tha se luftën e saj do ta vazhdojë në Kushtetuese.
Vendim i Supremes që konfirmoi atë të PZAP, ka bërë që Hoxhiq ta humb vendin si deputete në Kuvendin e ri të Kosovës dhe vendin e saj ta zë Duda Balje nga SDU.
“Unë i uroj suksese edhe Duda Baljes edhe atyre boshnjakëve. Ndoshta ka boshnjakë që duan të asimilohen. Nuk ma merr menja që do të vjen ndodhje ndryshim. Ne do të vazhdojmë dhe do të dorëzojmë një ankesë tek Gjykata Kushtetuese, por krejt kjo punë është e orkestruar. Iniciativa e Adriana Hoxhiqit nuk është e mirëseardhur dhe kjo është një fakt. Le ta merr vesh krejt bota që Kosova nuk është ligjore, vota e qytetarëve për komunitet nuk është e barabartë dhe nuk e di se si mendon Kosova që të vazhdojë përpara”, ka thënë ajo në emisionin “Frontal”, në T7./KosovaPress