Ushtruesi i detyrës së kryetarit të PDK-së, Enver Hoxhaj tha se sot do të duhej të ishte festë, por që theksoi se nuk do të jenë pjesë e kësaj ngjarjeje meqë nuk ka pasur vullnet për kandidat konsensual.
Ai ka shtuar se shefi i qeverisë dhe partia e tij po tentojnë instalimin e sistemit monist.
Hoxhaj: Albin Kurti nuk ka gatishmëri ta zgjedhim një president konsensual
“Isha në seancën bashkë me nënkryetarin e partisë. Ju e dini që ngjarjet e tilla qe ndodhin një herë në pesë vjet sipas kushtetutës duhet të jenë ngjarje të mëdha dhe festë. Por ne ai PDK nuk jemi pjesë e kësaj, sepse ne e kemi parë se Albin Kurti nuk ka pasur vullnet, gatishmëri që ta zgjedhim një president konsensual, por çka po ndodh sot është një president partiak”, tha ai.
Ai shtoi se në emër të PDK-së sot në seancë kanë bërë të ditur që nuk e bëjnë kuorumin dhe nuk mbështesin zgjedhjen e presidentit.
Hoxhaj: Seanca e sotme përpjekje për instalim të sistemit monist
“Seanca e sotme nuk është asgjë tjetër përveç përpjekjeve për instalim të sistemit monist. Shpreha keqardhje se ai LDK ka pasur rol për të shembur këtë sistem, me votën e tyre e kthejnë sistemin monist”, ka shtuar ai.
Hoxhaj ka shtuar se çfarë po ndodh sot ngjan në teatër, ku Albin Kurti është vetë skenarist e vetë regjisor. Ai është pyetur edhe për zgjedhjen e Hashim Thaçit president, i cili vinte nga një parti politike.
Hoxhaj: Përpjekje për një super kapje të shtetit
“Më thoni ju mua një situatë ku presidenti i Republikës, kryeministri dhe kryetari i Kuvendit kanë dalë në një listë zgjedhore. Prandaj pikërisht mënyra se si ne jemi sjellë sa kemi qenë në pushtet, tregon që në një demokraci si Kosova qeveris edhe partia e parë, dytë dhe tretë dhe opozita ka një rol në qeverisje. Kjo që po ndodh sot është një fillim i një ngulfatje të demokracisë. Një përpjekje për një super kapje të shtetit. Dhe një përpjekje për pushtet absolut”, ka deklaruar Hoxhaj. Hoxhaj ka shtuar se shpreh keqardhje për LDK-në që sot bëhet pjesë e një sistemi monist. /Sh.Pajaziti/KP/