Deputetja e Partisë Demokratike të Kosovës (PDK), Eliza Hoxha ka kërkuar nga deputetja Adelina Grainca kthimin e mandatit PDK-së. Në seancën e sotme të Kuvendit, ajo ka thënë se deputetja Grainca, e cila tani është pjesë e grupit parlamentar të Vetëvendosjes, nuk është ofenduar asnjëherë nga PDK, duke mohuar gjithashtu se grafitet në shtëpinë e saj janë bërë nga njerëz të PDK-së.
Deputetja Hoxha ka thënë se Grainca sa ka qenë në PDK e ka pasur hapësirën e mjaftueshme për të vepruar.
Hoxha: Deputetja Grainca t’i kthejë mandatin PDK-së
“Ne kërkojmë kthimin e mandatit të vjedhur nga votuesit e Partisë Demokratike të Kosovës. PDK nuk njihet si dikush që ka linçuar njerëz në historinë e saj, as nuk ka shkruar mbishkrime për asgjë nëpër muret e askujt, këtë zakonisht e ka bërë partia që ka qenë gjatë në opozitë e sot është në pushtet dhe e ka shumë të lehtë të identifikojë se kush i ka bërë ato mbishkrime, ju kujtoj vetëm disa për t’u kthyer memorien, linçimet ndaj Valdete Dakës, linçimet ndaj Aida Dërgutit, linçimet ndaj Edita Tahirit, linçimet ndaj Ganimete Musliut, ju madje keni shkuar aq larg sa keni dhunuar ambasadoren amerikane. Andaj, ne emër të grave, pikërisht në idenë e asaj se çka luftojmë ne për përfaqësim të barabartë, të dinjitetshëm, për të marrë vendime për vetën tonë, të lutëm ktheje mandatin e PDK-së”, ka thënë ajo.
Deputetja Adelina Grainca e cila ishte pjesë e Partisë Demokratike të Kosovës, ka kaluar në grupin parlamentar të Lëvizjes Vetëvendosje në ditën kur është votuar për zgjedhjen e presidentit të vendit. /KP