Kryeministri në detyrë, Avdullah Hoti ka uruar të gjithë mësimdhënësit për Ditën e Mësuesit, duke thënë se është mirënjohës dhe falënderues për gjithë kontributin e mësuesve ndër vite, në edukimin dhe arsimimin e gjeneratave të tëra, në kohë dhe rrethana jo gjithnjë të favorshme gjatë historisë tonë.
Hoti ka shkruar në Facebook se ka një respekt të veçantë për mësimdhënësit që mbajtën gjallë entuziazmin dhe idealin për liri e pavarësi gjatë viteve të 90-ta.
“Mirënjohje për mësimdhënësit në gjithë Kosovën për punën e jashtëzakonshme që kanë bërë gjatë këtij viti sfidues, kur vendi ynë sikurse e gjithë bota po vazhdon të përballet me pandeminë Covid-19. Qeveria në detyrë e Republikës së Kosovës do të angazhohet dhe të vazhdojë përkrahjen për ngritjen e cilësisë në të gjitha nivelet e arsimit. Të gjithë mësimdhënësve ju përcjelli urimet më të përzemërta dhe konsideratën time më të lartë për punën dhe kontributin tuaj të çmuar”, ka shkruar ai./KosovaPress