Ish-kryeministri Avdullah Hoti ka uruar kryetarin e ri të Kuvendit dhe kryeministrin Albin Kurti për marrjen e detyrës, duke theksuar se suksesi i tyre është i Kosovës dhe dështimi i tyre i kushton vendit.
Kryeministri i deritanishëm Hoti tha në një konferencë për media në orët e vona pas zgjedhjes së qeverisë së re se ka qenë nder që të udhëheqë vendin dhe është munduar të udhëheqë me integritet. Ndonëse, theksoi se i ka rënë përgjegjësia që të udhëheq me qeverinë e vendit në vitin më të vështirë që nga çlirimi i vendit.
Hoti: Kam udhëhequr me qeverinë në vitin më të vështirë që nga çlirimi i vendit
“Suksesi i tyre është sukses i Kosovës, ndërkaq dështimi i tyre na kushton të gjithëve. Prandaj, unë sinqerisht iu uroj sukses atyre për këto obligime dhe detyra të larta shtetërore që kanë marrë. Për mua ka qenë nder të udhëheq me Qeverinë e Republikës së Kosovës. Jam munduar gjatë gjithë kohës që të udhëheq me integritet dhe me kulturë institucionale siç i ka hije çdo kryeministri, cilido qoftë ai, e në veçanti atyre që vijnë nga radhët e Lidhjes Demokratike të Kosovës. Nuk ka qenë e lehtë. Jemi përballur me polarizime ekstreme politike, shpesh herë jo parimore dhe jo demokratike që neve na kanë vështirësuar punën e përditshme. Por kjo nuk ka ndodhur vetëm në qeverisjen time, ka ndodhur tash e dhjetë vjet. Mua më ka rënë përgjegjësia që të udhëheq me qeverinë e vendit në vitin më të vështirë që nga çlirimi i vendit. Objektivat kanë qenë të qarta për të menaxhuar pandeminë, për t’iu dalë në ndihmë qytetarëve dhe bizneseve në pasojat ekonomike dhe sociale që i ka sjellë pandemia. Për të përmirësuar marrëdhëniet me miqtë tanë, për të ndërmarrë reforma në institucionet e rendit dhe ligjit. E them me shumë kënaqësi që kemi arritur sukses të plotë në realizimin e këtyre objektivave”, theksoi Hoti.
Hoti foli edhe për pandeminë dhe rimëkëmbjen ekonomike, siç tha ai kanë mobilizuar afër 800 milionë euro për ekonomi.
Hoti: Me rimëkëmbje ekonomike kemi arritur sukses
“Te rimëkëmbja ekonomike kemi arritur sukses që nuk krahasohet me përvojat e vendeve tjera. Kemi mobilizuar afër 800 milionë euro për ekonomi, për biznese, për familje. Kemi paguar bizneset, pensionistët, familjet në asistencë sociale, buqit të pa punët, komunat dhe grupet tjera të popullsisë. Dhe sot gjendja ekonomike është përmirësuar dukshëm krahasuar me muajt e parë të pandemisë. Tek zhvillimi ekonomik kemi bërë hapa të mëdhenj, duke krijuar bazën për një zhvillim ekonomik afat gjatë”, theksoi Hoti.
Po ashtu Hoti foli edhe për marrëveshjen e Uashingtonit, të cilën e quajti historike.
Hoti: Marrëveshja e Uashingtonit është historike
“Mbi të gjitha, kemi përmirësuar marrëdhëniet me miqtë tanë, kemi rivendosur komunikim korrekt me ta, kemi ri-filluar dialogun mbi parime të qarta dhe sot askush s’mund ta kontestojë progresin mbi këto parime që është arritur në dialog. Kemi hequr nga diskutimi komplet temën e ndarjes së Kosovës. Kemi arritur marrëveshjen historike të Uashingtonit që është arritja më e madhe nga shpallja e pavarësisë e këndej. Kemi siguruar një njohje, pas katër-pesë vjetësh bllokadë të plotë për njohje të reja të Kosovës. Një njohje e rëndësishme strategjike për shtetin e Kosovës”, theksoi Hoti, duke iu referuar njohjes nga Izraeli si pjesë e marrëveshjes së Uashingtonit për normalizim ekonomik ndërmjet Kosovës dhe Serbisë.
Hoti nuk la pa përmendur edhe reformat në institucionet e rendit dhe ligjit, derisa në fund duke theksuar se kontributin e radhës do ta ketë në Kuvend si deputet.
Hoti: Stuhia zgjedhore përfundon shpejtë e të vërtetat dalin në dri
“Stuhia zgjedhore përfundon shpejt e të vërtetat dalin në dritë. Vetëm të vërtetat i qëndrojnë kohës, ne do të jemi këtu për ta bërë shtetin e Kosovës”, theksoi ai.
Ndryshe, me 67 vota për, 30 kundër dhe asnjë abstenim, deputetët e Kuvendit të Kosovës sot pasdite kanë zgjedhur Qeverinë Kurti 2. /I.Shabani/KP