Kryetari i Aleancës për Ardhmërinë e Kosovës (AAK), Ramush Haradinaj ka bërë të ditur se kërkojnë rinumërim të plotë të votave derisa i ka quajtur kriminelë ata që keqpërdorën votën në zgjedhjet e 14 shkurtit. Ai sot ka mbledhë nënkryetarët e partisë dhe kryetarët e komunave, takim pas së cilit, kreu i AAK-së ka thënë se duhet të përfundojnë në burg të gjithë keqpërdoruesit e votës.
Pas rreth një orë takim në selinë e AAK-së në Prishtinë, lideri i kësaj partie ka theksuar rinumërimi i plotë i votave duhet të bëhet në prezencë të policisë dhe hetuesisë.
Haradinaj: Kriminelët e votës të përfundojnë në burg
Video
“Kërkojmë nga organet e rendit dhe ligjit, hetuesisë, kërkojmë që kriminelët e votës të përfundojnë në burg, të gjitha partive, për këtë arsye kërkojmë rinumërim të plotë të votave me prezencë të hetuesisë, policisë, që të vërtetohet e vërteta, të gjendet e vërteta. Ndërtimi i institucioneve duhet të bëhet sa më shpejtë, ne nuk kontestojmë rezultatin zgjedhor, përqindjen tonë apo përqindjen e Vetëvendosjes, LDK-së, PDK-së apo partive tjera dhe nuk shoh që dikush duhet me dalë kundër rinumërimit përpos nëse fshehin keqpërdorime për të cilat nuk di opinion”, ka thënë Haradinaj.
Derisa ka folur shkurt pas takimit, Haradinaj ka bërë të ditur se nuk ka hequr dorë nga synimi për të marrë postin e presidentit të Kosovës duke shtuar se mbesin të hapur për diskutim.
Haradinaj: E kemi të njëjtën ofertë të zgjedhje nëse dikush kërkon partneritet me AAK
Video
“Kemi dalë në zgjedhje me ofertë, kemi po atë ofertë, nëse dikush kërkon partneritet me ne nëse jo e ndihmojmë vendin nga pozicioni i opozitës”, ka thënë ai.
Mbledhja e AAK-së është zhvilluar disa ditë pasi në publik ka dalë një video që ngritë dyshime se ish-ministrja e Punëve të Jashtme, Meliza Haradinaj-Stublla, nga radhët e AAK-së, ka blerë vota në mënyrë që të arrijë të fitojë edhe një mandat në Kuvendin e Kosovës.
Prokuroria ka ndaluar disa persona lidhur me këtë çështje ndërkohë ende nuk është vërtetuar një dyshim i tillë.
Haradinaj-Stublla ka dhënë dorëheqje nga posti qeveritar dhe të gjitha funksionet në AAK./G.Kadrija/KosovaPress