Lideri i Aleancës për Ardhmërinë e Kosovës, Ramush Haradinaj ka mbajtur tubim elektoral në Pejë për zgjedhjet e 14 shkurtit, në të cilat po kërkon përkrahje që të bëhet president i ardhshëm i Kosovës. Bartësi i listës së AAK-së ka premtuar ringjallje të ekonomisë së vendit dhe anëtarësim të shtetit në Bashkim Evropian, në të kundërtën, sipas tij, Kosova do të bashkohet me Shqipërinë.
Para përkrahësve të tij në Pejë, në sheshin e qytetit, Haradinaj ka thënë se Kosova do të ecë përpara në rrugëtimin e saj.
Haradinaj: I kemi njerëzit tanë andej kufirit, bashkohemi me Shqipërinë në union
(Video) 26
“Ata që kujtojnë se e bllokojnë Kosovën mashtrohen, ata e dinë shumë mirë që nuk munden me na blloku, nuk kanë mundur kurrë, kanë provuar në mënyra në mënyra të ndryshme ne na ndalë, me na dorëzua, por jo Kosova po ecë rrugës së vet, Kosova ka me gjet rrugën e vet. E nëse i besojnë rrugës së bllokimit të Kosovës le ta dinë që andej i kemi vëllezërit e motrat tanë, Shqipërinë, bashkohemi me Shqipërinë, bashkohemi në union”, ka thënë Haradinaj.
Haradinaj ka thënë se e kanë prioritet ekonominë, shtetin ligjor dhe sigurinë.
Haradinaj: Të gjithë po i marrin idetë dhe programin e AAK-së
(Video) 24
“E kemi një luftë serioze sot në Kosovë, është ekonomia, ekonominë e kemi keq, pandemia e ka dobësuar shumë ekonominë e Kosovës, e ka dobësuar qytetarin e Kosovës, e ka dobësu Kosovën, por kemi punuar seriozisht planin tonë dhe e keni parë në televizione e në debate sa seriozisht kemi punuar, dhe e keni parë që të gjithë po i marrin idetë tona programore, formulat tona dhe ne jemi të kënaqur dhe kemi me u ndihmu të gjithëve, kemi me ndihmu qeverinë e vendit me zgjedh problemin ekonomik, me u rritë ekonomia, me u hap vende të punës”, ka thënë ai.
Sipas Haradinajt, përmes sondazheve po bëhen përpjekje që të binden qytetarët kënd të votojnë më 14 shkurt.
Haradinaj: Aleancës i beson populli
(Video)
“Ka që po mundohen me sondazhe me e bindë votuesin kah me votu, dhe tani po provojnë me i dhënë ato rezultate dhe po e bindin vetën sa shumë kanë, të u them të drejtën uroj që të kenë sa më shumë të gjitha partitë votë, dhe nuk jam kundër sa më shumë që u beson populli, pir një gjë e dimë edhe ne, Aleancës i beson populli”, ka shtuar Haradinaj.
Haradinaj është bartës i listës zgjedhore të Aleancës për Ardhmërinë e Kosovës në zgjedhjet e 14 shkurtit, por ai nuk synon ekzekutivin duke bërë të qartë që po kërkon mbështetje që të bëhet kryetar shteti. /G.Kadrija/KosovaPress