Koalicioni i organizatave për vëzhgimin e zgjedhjeve, Demokracia në Veprim ka deklaruar që paraditen e sotme është vërejtur dalje e madhe e votuesve në zonat e banuara me shumicë serbe derisa në pjesët e tjera të Kosovës trendi i daljes është i përafërt me zgjedhjet 2019.
Monitoruesit e DnV-së kanë raportuar për mos-respektim të masave antiCOVID gjatë procesit të votimit, votim me dokumente jo-valide e cenim të fshehtësisë së votës.
Eugen Cakolli nga DnV, në një konferencë për media tha se procesi i votimit deri tani ka vijuar i qetë, por jo me respektim të plotë të masave antiCOVID.
Siç tha ai, në 21 për qind të vendvotimeve është raportuar për zbatim të pjesshëm të masave ndërsa në 1 për qind të vendvotimeve nuk janë respektuar fare masat për parandalimin e përhapjes së koronavirusit.
Cakolli: Dalje e madhe e votuesve në zonat me shumicë serbe
(Video)
“Deri më tani, që nga hapja është karakterizuar me një dalje të madhe të votuesve në zonat me shumicë serbe, përderisa në pjesën tjetër të Kosovës kemi një trend përafërsisht të njëjtë të daljes edhe në zgjedhjet e kaluara të vitit 2019”, tha ai.
Ani pse në këto zgjedhje Komisioni Qendror i Zgjedhjeve ka larguar nga lista përfundimtare e votuesve personat me dokumente të UNMIK-ut apo të tjera që nuk janë të Republikës së Kosovës, vëzhguesit e DnV-së kanë raportuar për raste kur është votuar me dokumente jo valide.
Cakolli: Ka pasur raste të votimit me dokumente jo-valide
(Video)
“Sërish është evident fakti që ka pasur raste të votimit me dokumente jo valide e cila si parregullsi është hasur në 4% të vendvotimeve në raste të izoluara përkatësisht deri në 10 raste për vendvotim”, tha Cakolli.
Zvogëlimi i numrit të përgjithshëm të vendvotimeve nga ana e KQZ-së, nga 2547 sa kanë qenë në vitin 2019 në 2382 tani, sipas Cakollit ka prodhuar vështirësi të qytetarët, të cilët në disa raste nuk kanë arritur të gjejnë emrat e tyre në listë ne votuesve.
Ai tha se janë evidentuar 33 për qind të rasteve kur qytetarët nuk kanë arritur të gjejnë emri ne tyre në listën përfundimtare të votuesve. Ndërsa një tjetër parregullsi e hapur sipas DnV-së është edhe cenimi i fshehtësisë së votës.
Cakolli: Një deri në katër raste në 2% të vendvotimeve ka pasur fotografim të votës
(Video)
“Cenimi i fshehtësisë së votës, i cili manifestohet kryesisht përmes fotografimit të saj ka vijuar që të shfaqet edhe në këto zgjedhje. Fotografimi i votës dhe bërja e saj publike flitet se ka të bëjë edhe me blerjen e votës apo frikësimin e votuesve, deri në ora 10:00 vëzhguesit e DnV-së kanë raportuar për rreth një deri në katër raste në 2% të vendvotimeve në nivel vendi të cilat kanë pasur raste të fotografimit të votës”, tha ai.
Demokracia në Veprim ka raportuar se deri në orën 10:00 të drejtën kushtetuese për të votuar e kanë shfrytëzuar rreth 5.2% e qytetarëve me të drejtë vote.
Të drejtë vote në këto zgjedhje kanë 1.794.862 qytetarë të Kosovës./G.Kadrija/KosovaPress