Banka për Biznes (BPB) është bërë sponsor gjeneral i Federatës së Tenisit të Kosovës, me qëllim të avancimit të sportit të tenisit.
Kjo marrëveshje u nënshkrua nga drejtori ekzekutiv i Bankës për Biznes, Arton Celina dhe kryetarit të Federatës së Tenisit të Kosovës, Mejdi Rexhepi.
Me këtë rast, Celina tha se përmes nënshkrimit të kësaj marrëveshjeje synojnë të kontribuojnë në zhvillimin e mëtejmë të sportit të tenisit në vend.
Ai theksoi se presin që ky bashkëpunim të kurorëzohet me suksese të mëdha në arena të ndryshme.
Celina: Presim që ky bashkëpunim të kurorëzohet me suksese të mëdha
Video
“Jam shumë i lumtur që sot së bashku me kryetarin Mejdi Rexhepi kemi nënshkruar ‘Marrëveshjen për sponsorizimin e Federatës të Tenisit’. Është një ngjarje shumë me rëndësi për neve. Ne deri më sot kemi qenë sponsor të shumë klubeve në sporte të ndryshme, por sot është një ditë e veçantë sepse marrëveshja është me një federatë me të cilën shpresojmë të kemi një kontribut në avancimin e sportit të tenisit, sport ky, i cili kohëve të fundit është duke u zhvilluar dhe afirmuar tek të rinjtë e Kosovës… Uroj që ky bashkëpunim të kurorëzohet me suksese të mëdha në arena të ndryshme”, tha ai.
Ndërsa kryetari i Federatës së Tenisit të Kosovës, Mejdi Rexhepi, tha se sponsorizimi që do të marrin përmes kësaj marrëveshjeje do të thotë shumë për tenisin, pasi do të mundësoj promovimin e këtij sporti kudo në Kosovë.
Duke shprehur mirënjohje për bankën e vendit “BPB”, Rexhepi tha se ky është një investim strategjik që Kosova të jetë shoqëri e sportit.
Rexhepi: BPB po na mundëson të promovojmë tenisin kudo në Kosovë
Video
“Sot për tenisin është një ngjarje e jashtëzakonshme sepse arritëm një marrëveshje me bankën vendore ‘Bankën për Biznes’, një marrëveshje sponsorizimi afatgjatë. Kjo është hera e parë për neve si Federatë e Tenisit… Unë besoj që ky investim… do të thotë shumë për tenisin sepse do të na japë mundësi si federatë që tenisin ta promovojmë në tërë Kosovën, që ta masivizojmë dhe nesër të presim që të kemi edhe lojtarë që të na përfaqësojnë jo vetëm në nivelin lokal ose vendor këtu, por edhe në nivelin ndërkombëtar”, tha ai.
E ata që më së shumti iu gëzuan kësaj marrëveshjeje padyshim se janë vet teniserët, të cilët do të kenë rastin të prekin nga afër investimet që do të bëhen në promovimin e këtij sporti.
Vesa Gjinaj, kampione për femra në Kosovë tha se ky sport meriton të ketë një partner serioz siç është BPB-ja.
Ajo u shpreh e lumtur që përmes këtij investimi do të mund të arrijnë më lehtë sukseset për të cilat punojnë.
Gjinaj: Ky sport meriton të ketë partner serioz si BPB
Video
“Falënderoj BPB-në për përkrahjen. Ky sport meriton të ketë partner serioz si BPB, në mënyrë që talentet që kemi të arrijnë sukseset që meritojnë”, tha ajo.
Edhe teniseri Granit Bajraliu shprehu mirënjohje për Bankën për Biznes, duke thënë se kjo mbështetje do t’i shërbej shumë tenisit.
Bajraliu: . Shpresojmë që BPB të shërbejë si shembull edhe për kompani të tjera
Video
“Faleminderit shumë për përkrahjen. Shpresojmë që BPB të shërbejë si shembull edhe për kompani të tjera për të përkrahur tenisin. Ne kemi shumë teniserë të mirë, e iniciativa si kjo e BPB-së, do të krijojë kushte edhe më të mira për të rinjtë në tenis dhe do të ndihmojë që të popullarizojmë këtë sport edhe më shumë”, tha ai.
Banka e vendit BPB ka qenë sponsor i shumë klubeve në sporte të ndryshme, ndërsa kjo është marrëveshja e parë afatgjatë me Federatën e Sportit të Tenisit, përmes së cilës synojnë të avancimin dhe shtrirjen e këtij sporti në gjithë territorin e Republikës të Kosovës./N.Jakupi/ /KosovaPress