Valuta më e madhe digjitale në botë, Bitcoin, sot tejkaloi kapitalin e tregut në vlerë 900 miliardë dollarësh për herë të parë në histori.
Kjo ndodhi pasi çmimi i kësaj monedhe digjitale arriti një nivel të ri rekord.
Pasi arriti një çmim rekord prej 48,481 dollarë të enjten në mëngjes, Bitcoin mbylli tregtinë me 47,932 dollarë, e cila, sipas Reuters, është një rritje prej 6.9 për qind në bazë ditore.
Në bursën e Bitstamp, një nga më të vjetrat për tregtimin e Bitcoin, çmimi arriti një nivel historik prej 49,000 dollarë në një pikë, e cila rezultoi në një kapital afatshkurtër të tregut prej 912,69 miliardë dollarë.
Kjo do të thotë se vlera e tregut e kësaj monedhe virtuale u rrit me 354 miliardë dollarë gjatë vitit 2021. Niveli i mëparshëm më i lartë i kapitalit të tregut Bitcoin u regjistrua më 8 shkurt në shumën 888 miliardë dollarë.
Bitcoin aktualisht ka një pjesëmarrje prej 61 për qind në kapitalin e përgjithshëm të tregut të të gjitha valutave digjitale, e cila sot gjithashtu arriti një rekord të të gjitha kohërave me 1.46 miliardë dollarë.
Kapitali kumulativ i tregut i të gjitha monedhave digjitale është rritur 88.5 për qind që nga fillimi i vitit 2021, deri më tani krahasuar me nivelin fillestar prej 776 miliardë dollarësh në fillim të vitit.
Sipas të dhënave të Kompanisë MarketKap, Bitcoin tani është aseti i nëntë më i vlefshëm në botë për sa i përket kapitalit të tregut, dhe javën e kaluar ai ka tejkaluar Facebook dhe Tesla në këtë aspekt.
Nëse vlera e tregut të Bitcoin krahasohet me renditjen e bruto prodhimit vendor të vendeve, 900 miliardë dollarët e saj janë midis vlerës së GDP-së së Meksikës (1.04 trilionë dollarë) dhe Holandës (886 miliardë dollarë) dhe është gjithashtu përpara Zvicrës, GDP e së cilës është 707 miliardë dollarë./KosovaPress