Është arrestuar një person për krime lufte kundër popullsisë civile gjatë luftës në Kosovës.
Prokuroria Speciale e Kosovës ka njoftuar se i arrestuari është M.A i nacionalitetit shqiptar me shtetësi të Serbisë.
Ai dyshohet se ka marrë pjesë në masakrën e Izbicës të Skenderajt.
“Prokuroria Speciale e Republikës së Kosovës (PSRK), njofton opinionin se është ndaluar një (1) person me inicialet M.A., për veprën penale ‘Krime lufte kundër popullsisë civile’, në shkelje të nenit 142 të Kodit Penal të ish RSFJ si ligj në fuqi në kohën e kryerjes së veprës penale, po ashtu e dënueshme edhe me nenin 146 të KPRK-së. Prokuroria Speciale njofton se M.A. i nacionalitetit shqiptar, shtetas i Republikës së Serbisë, dyshohet se ka marr pjesë në masakrën e Izbicës, gjatë luftës në Kosovë. I njëjti brenda afateve ligjore do të paraqitet para Gjyqtarit të procedurës paraprake”, thuhet në komunikatën e prokurorisë.
Kujtojmë se më 28 mars 1999, forcat policore dhe ushtarake serbe, pas rrethimit të mijëra civilëve të fshatit Izbicë dhe vendbanimeve përreth, veçuan 147 burra të rinj dhe pleq, të cilët i vranë dhe i masakruan, ndërsa pjesën tjetër e dëbuan jashtë Kosovës.
Masakra e Izbicës hyn në radhën e krimeve më të rënda të shtetit të Serbisë, ku vrasja masive, përdhosja e trupave dhe varrimi i tyre, përmes pamjeve satelitore, u bë lajm botëror./KP