Kryetari i Komunës së Prishtinës Shpend Ahmeti ka uruar me rastin e zgjedhjes së Qeverisë së re të drejtuar nga Albin Kurti.
Ahmeti ka thënë se urimi i tij për Qeverinë Kurti 2 vjen jo për shkak se ai pajtohet me politikat e Albin Kurtit, por për shkak të jetësimit të vullnetit të shprehur të qytetarëve në zgjedhjet e 14 shkurtit.
“Se a janë emrat e ministrave të duhur, do të kemi mjaftueshëm kohë të vlerësojmë. Nga ajo çka dëgjova në prezantimin e kryeministrit Kurti dhe duke ditur situatën financiare sot dhe potencialin nesër jam skeptik për realizimin e tyre. Nuk ka nevojë që të rriten pritjet edhe më shumë. Kësaj radhe vetëm për mundësitë financiare edhe pse nuk pajtohem për disa nga politikat. Por, do t’i gëzohesha shumë realizimit të disa prej tyre”, ka shkruar Ahmeti në Facebook.
Ndryshe, Shpend Ahmeti para se të kalonte në radhët e PSD-së kishte qenë pjesë e Lëvizjes Vetëvendosje së Albin Kurtit, gjatë së cilës mori dy mandate në Prishtinë.
Postimi i plotë:
Urime Qeverisë së re të Republikës së Kosovës! Jo pse pajtohem me politikat, por për shkak se vullneti i qytetarëve duhet të jetësohet. Se a janë emrat e ministrave të duhur, do të kemi mjaftueshëm kohë të vlerësojmë. Ne që jemi në institucione kemi adresë të qartë për funksionimin e shtetit, ndërsa qytetarët – edhe ata që e kanë votuar edhe ata që nuk e kanë votuar- do të kenë adresë për kërkesat e tyre dhe mund të kërkojnë përgjegjësi.
Nga ajo çka dëgjova në prezantimin e kryeministrit Kurti dhe duke ditur situatën financiare sot dhe potencialin nesër jam skeptik për realizimin e tyre. Nuk ka nevojë që të rriten pritjet edhe më shumë. Kësaj radhe vetëm për mundësitë financiare edhe pse nuk pajtohem për disa nga politikat. Por, do t’i gëzohesha shumë realizimit të disa prej tyre.
Megjithatë, sot, uroj punë të mbarë!/KP