Kryetari i Lipjanit Imri Ahmeti, sot në selinë e partisë së Lidhjes Demokratike të Kosovës (LDK) në Prishtinë ka sqaruar se kjo parti të hënën nuk ka mbajtur takim me struktura ose kryetar degësh.
Kryetari i degës së LDK-së në Lipjan, Ahmeti i shoqëruar me kryetarin e Pejës, Gazmend Muhaxheri tha se sot në parti kanë pasur një takim vetëm për kafe me kryetarin e ri të LDK-së, Lumir Abdixhiku.
Ahmeti tha se Kryesia e re ende s’është konstituar dhe i mbetet kryetarit të ri të bëj agjendën për thirrjen e Këshillit të përgjithshëm.
Ahmeti: Nuk ka pasur takim, ishte një ndej pas homazheve tek presidenti Rugova
Video
“Jo, absolutisht, tash do të vazhdojnë konsultimet e kryetarit me kryetarët e degëve, me njerëzit që ai mendon se duhet me u konsultuar. Nuk ka pasur takim, është ndej rasti pas homazheve që kishim tek presidenti historik. Kryesia e re nuk është konstituar ende. Pritet, kryetari sigurisht do ta bën agjendën e vetë për me thirr këshillin e përgjithshëm, e ky këshill është organ që merr vendim për kryesinë me propozimin e kryetarit”, tha Ahmeti.
Ndërsa, dje në kuvendin e LDK-së, me 191 vota ishte zgjedhur kryetari i ri kësaj partie, Lumir Abdixhiku. Në garë ishin Lutfi Haziri dhe Besian Mustafa. /I. Shabani/KosovaPress