Në seancën e sotme të Kuvendit të Kosovës, deputeti i Lëvizjes Vetëvendosjes, Artan Abrashi tha se deputetët e opozitës po vazhdojnë të sulmojnë deputetet femra në Kuvend.
Abrashi theksoi se opozita fillimisht ka sulmuar presidenten Vjosa Osmani dhe pastaj deputeten Adelina Grainca, e cila së fundmi ka kaluar nga PDK në LVV.
Deputeti Abrashi tutje tha se opozita mund të bëjë sulme sa të dojë ndaj LVV-së, por duhet të largohen nga kjo sjellje ndaj deputeteve femra.
Abrashi: Sulmet e egra ndaj Lëvizjes Vetëvendosje bëni sa të doni, nuk është se na bëjnë përshtypje
“Problemet tuaja partiake sikurse dështimi në reformimin e brendshëm, mungesa e hapësirës brenda partisë, ngecja avancimit të rolit të gruas nuk mund t’i mbuloni përmes denigrimit të personalitetit dhe integritetit të njeriut. Duket haptazi se dëshpërimi nga humbja që e pësuat në zgjedhje iu ka ulur në atë pikë sa që edhe antifeminizimi si ideologji regresive po synoni ta normalizoni në diskursin publik, e pastaj ndoshta ta bëni si normë brenda institucionit. Sulmet e egra ndaj Lëvizjes Vetëvendosje bëni sa të doni, nuk është se na bëjnë përshtypje. Opozitarimin ndaj pushtetit besa e keni edhe obligim, por aman largohuni dhe distancohuni nga qasjet e tilla primitive dhe të rrezikshme të kujtdo qofshin ato dhe nga do qofshin ato, në luftën kundër diskriminimit të pa barazisë duhet të jemi bashkë”, tha Abrashi.
Kuvendi po vazhdon diskutimet në kuadër të rendit të ditës, e që pritet të ketë debat edhe për gjendjen e pandemisë. /KP