Kandidati për kryetar të Lidhjes Demokratike të Kosovës (LDK), Lumir Abdixhiku, ka thënë se nga prishja e koalicionit me Lëvizjen Vetëvendosje në Qeverinë e kaluar, ky subjekt nuk do të duhej të vazhdonte që të qëndronte më në krye të ekzekutivit me parti të tjera.
Abdixhiku në Rubikon të Klan Kosovës ka deklaruar se gabimet për rënien e rezultatit të LDK-së janë nga zgjedhjet e 6 tetorit 2019.
“Hapat që kanë shtyrë drejt rënies se rezultatit janë prishja e Qeverisë në kohë të pandemisë, jo për fajin e LDK-së për më tepër për mënyrën e artikulimit të kësaj prishjeje dhe për vrapimin për ta marrë qeverinë menjëherë”, ka thënë ai, duke shtuar se përpjekjet për ta marrë Qeverinë në kohë jo të favorshme kanë qenë fatale për rënien e rezultatin e LDK-së në zgjedhjet e fundit.
“Zgjedhjet nuk ishin alternativë se ishte pandemi, por siç nuk ishte alternativë edhe rrëzimi i Qeverisë, për më tepër provimi i ndërtimit të një Qeverie stabile me partnerët që nuk kishim konsideratë të plotë asokohe. Gjithë këto çështje e bën situatën të tensionuar të LDK-së në publik, ne e humbëm betejën politike, kjo pakënaqësi më pas shpërtheu në zgjedhjet e viti 2021 dhe rezultatin që e kemi tani, janë arsye që i kemi marrë nga terreni dhe me njerëzit që janë larguar nga Qeveria”, u shpreh Abdixhiku.
LDK në zgjedhjet e 14 shkurtit shënoi rezultatin më të dobët me vetëm rreth 13 për qind të votave, e cila çoi në dorëheqjen e kryetarit Isa Mustafa, pasuesi i të cilit do të zgjidhet në Kuvendin e kësaj partie më 14 mars, ku kandidaturat tashmë i kanë shpallur edhe Anton Quni, Besian Mustafa dhe Lufti Haziri./KosovaPress